Dunyoning turli nuqtalarida siyosiy, ijtimoiy-iqtisodiy vaziyat tangligi muammolarni hal qilish va real muloqot muhitini yaratishni tobora murakkablashtirmoqda. Mana shunday vaziyatda dunyo davlatlari parlamentlarining hamkorligi va hamjihatligi katta ahamiyat egadir. Parlamentlararo ittifoqning mamlakatimizda o‘tadigan 150-yubiley Assambleyasi shu tomondan ham tarixiy tadbir, desak mubolag‘a bo‘lmaydi.
Jahon parlamentlarining eng nufuzli tashkiloti hisoblanadigan Parlamentlararo ittifoq “Ijtimoiy taraqqiyot va adolat uchun parlament harakati” degan umumiy shior ostida hayotiy dolzarb mavzularni muhokama qilishi kutilmoqda.
Ijtimoiy taraqqiyot davlatlar va xalqlarni jipslashtiradigan o‘ta muhim mezon hisoblanadi. Ijtimoiy taraqqiyot va barqarorliksiz mamlakatlar ravnaq topishi, siyosiy vaziyat mustahkam bo‘lishi imkonsizdir. Parlamentlararo ittifoqning kun tartibi shu ma’noda ham jahon hamjamiyati uchun ustuvor ahamiyatga ega.
Dunyo mamlakatlari parlamentlari delegatsiyalari yurtimizda muhokamalar olib boradigan asosiy yo‘nalishlardan biri aholini ijtimoiy himoya qilish va kambag‘allikni qisqartirish masalalari bo‘ladi. Ijtimoiy taraqqiyot uchun shu ikki hayotiy va bir-biriga chambarchas bog‘liq masalalarda samarali harakat qilish talab etiladi. O‘zbekiston Xalq demokratik partiyasining asosiy dasturiy maqsadlari ham ana shu ezgu va strategik maqsadlarga tayanadi.
Alohida qayd etish kerakki, bu yo‘nalishda O‘zbekistonda keyingi yillarda ulkan tajriba to‘plandi, muammolar bosqichma-bosqich hal etilib, zarur natijalarga ham erishilmoqda. Kambag‘allikni qisqartirish bo‘yicha vazifalarni bajarish, yangi imkoniyatlar topish, ijtimoiy-iqtisodiy faollikni rag‘batlantirish va o‘zaro qo‘llab-quvvatlash davlat va jamiyatimizning doimiy kun tartibiga aylandi.
Aholini ijtimoiy himoya qilish va kambag‘allikni qisqartirish bo‘yicha qisqa muddatda katta natijalarga erishayotgan, bu bo‘yicha strategik maqsadlar qo‘ygan mamlakat sifatida O‘zbekiston dunyo miqyosida munosib e’tirof etiladi.
Ijtimoiy taraqqiyot keng ma’noga ega tushuncha ekani ma’lum. Bu avvalo odamlarga yashash, o‘rganish, mehnat qilish, salomatligini asrash va himoyalanish bilan bog‘liq imkoniyatlarning kafolatlangan bo‘lishi hamdir. Insonning fundamental huquqlari ana shu kafolatlarsiz ta’minlanmasligini hammamiz yaxshi anglaymiz. Bugun butun dunyoda fuqarolar birlamchi huquqlarini mone’liksiz amalga oshirishi uchun sharoit yaratish, hukumatlarni xalqlar oldida shunga mas’uliyatli qilish zarurati oshib bormoqda.
Davlatning ijtimoiy taraqqiyot uchun xalq oldida mas’ulligi borasida O‘zbekistonda o‘ziga xos tajriba to‘planmoqda. Fakt va raqamlar, asosiysi, hayotiy natijalar buni isbotlab turibdi. Konstitutsiyamizda O‘zbekiston ijtimoiy davlat ekani belgilandi. Shu asosda ijtimoiy himoya tizimi aholiga yaqinlashtirilmoqda. Misol uchun, barcha hududlarimizda “Inson” markazlari ochilib, 102 ta ijtimoiy xizmat mahallalarda yo‘lga qo‘yildi. Kelasi yil 1 million 200 ming aholini kambag‘allikdan chiqarish uchun ta’lim, to‘garak, kasb-hunar, tibbiyot masalalarini hal qilish va yashash sharoitini yaxshilash bo‘yicha qat’iy vazifalar belgilangan.
Ijtimoiy yordam olishni tizimlashtirish maqsadida 10 dan ortiq hujjat tayyorlash va topshirish talabi bekor qilinib, yagona “ijtimoiy karta” joriy etilmoqda. Nogironligi borlarga beriladigan protez va reabilitatsiya vositalari ro‘yxati 18 tadan 30 taga, bu yildan yana 7 turdagi vositalar qo‘shilishi belgilangan. Bunday fakt va raqamlar ijtimoiy taraqqiyot va adolat uchun nihoyatda muhim, albatta.
Keyingi yillarda parlament diplomatiyasi O‘zbekiston tashqi siyosatining eng muhim yo‘nalishlaridan biriga aylandi. 2017 yildayoq, ya’ni yangi islohotlar davri boshlanishi bilan yurtimiz Parlamentlararo ittifoqqa a’zoligini qayta tiklaganini ta’kidlash kerak. O‘tgan qisqa davr ichida milliy parlamentimiz dunyo mamlakatlari parlamentlari, shuningdek, ittifoq bilan barqaror va ishonchli hamkorlik munosabatlarini o‘rnatdi, ayni vaqtda doimiy rivojlantirish harakatida.
Vatanimizda o‘tadigan Assambleya parlamentlararo strategik hamkorlik aloqalarining izchil tus olishi uchun, dunyodagi ijtimoiy taraqqiyot uchun muhim global muloqot platformasiga aylanishiga ishonamiz.
Ulug‘bek Inoyatov,
Oliy Majlis Qonunchilik palatasidagi
O‘zbekiston XDP fraksiyasi a’zosi