Oliy Majlis Qonunchilik palatasidagi O‘zbekiston XDP fraksiyasi a’zosi Zokirjon Zoxidov Farg‘ona viloyatining Rishton tumanida saylovchilar bilan uchrashuvlar o‘tkazganida ta’lim masalasida murojaatlar tushgan edi.

Xususan, hudud jamoatchiligi vakillari Rishton tuman 1-sonli politexnikumi «Maktabgacha ta’lim tashkiloti tarbiyachisi» bo‘yicha yangi yo‘nalishga 120 nafardan ziyod fuqarolar bilan dual ta’lim shaklida shartnomalar tuzilgani, qo‘shni Bag‘dod va Oltiariq tumanlaridan ham fuqarolar mazkur yo‘nalish bo‘yicha ta’lim olish istagini bildirayotgani ma’lum qilindi. O‘rganish davomida kelgusida politexnikumda yana 150 nafar fuqaro bilan shartnomalar tuzish imkoniyati mavjudligi aniqlangan.

Shularni inobatga olib, deputat politexnikumda ushbu ta’lim yo‘nalishi ochilishida amaliy yordam berishni so‘rab, Oliy ta’lim, fan va innovatsiyalar vaziri K.Sharipovga so‘rov yuborgandi.

So‘rovga vazirning birinchi o‘rinbosari Sh.Daliyevdan javob kelgan bo‘lib, “Maktabgacha ta’lim tashkiloti tarbiyachisi” mutaxassisligi bo‘yicha tegishli korxona va tashkilotlar bilan dual ta’lim shaklida o‘qishni tashkil qilish yuzasidan tuzilgan shartnomalar, kasbiy ta’lim tashkilotining moddiy texnik va o‘quv metodik bazasi mavjud bo‘lganda politexnikumga Vazirlik tomonidan ruxsat berilishini ma’lum qilingan edi.

Saylovchilar murojaatlari yechim topishi hududlarning har tomonlama rivojlanishiga xizmat qiladi.