O‘zbekiston Xalq demokratik partiyasi Qoraqalpog‘iston Respublikasi Kengashi tomonidan Berdaq nomidagi Qoraqalpoq davlat universitetida tashkil etilgan “Deputat va yoshlar” uchrashuvida oliy o‘quv yurti professor-o‘qituvchilari, talaba yoshlar, deputatlar, partiyaning “Yoshlar qanoti” a’zolari va ommaviy axborot vositalari vakillari ishtirok etdi.
Tadbirda so‘zga chiqqanlar bugungi kunda yurtimizda olib borilayotgan keng ko‘lamli islohotlar, shu jumladan, yoshlarga yaratilayotgan imkoniyatlar, ularning o‘z tashabbuslarini ro‘yobga chiqarishlari uchun yaratilgan sharoitlarga, partiyaning dasturiy maqsad va vazifalarini targ‘ib qilishda partiya tashkilotlari va deputatlar hamda partiyaning yoshlar bilan ishlash yo‘nalishida olib borilayotgan ishlarga to‘xtalib o‘tdi.
Shu bilan birga, “Atrof-muhitni muhofaza qilish va “yashil iqtisodiyot” yili” Davlat dasturining mazmuni va ahamiyati, shuningdek, mamlakatimizda yoshlarga yaratilayotgan sharoitlar, imkoniyatlar va imtiyozlar haqida keng tushunchalar berildi.
Keng jamoatchilik muhokamasi asosida joriy yil 30 yanvardagi O‘zbekiston Respublikasi Prezidentining farmoni bilan tasdiqlangan Davlat dasturida har bir insonga o‘z salohiyatini ro‘yobga chiqarish uchun munosib sharoitlar yaratish, barqaror iqtisodiy o‘sish orqali xalqning farovonligini ta’minlash, suv resurslarini tejash va atrof-muhitni muhofaza qilish, qonun ustuvorligini ta’minlash, xalq xizmatidagi davlat boshqaruvini tashkil etish hamda “Xavfsiz va tinchliksevar davlat” tamoyiliga asoslangan siyosatni izchil davom ettirish yo‘nalishlarida 286 ta amaliy chora-tadbir, 101 ta normativ-huquqiy hujjat, 257 ta maqsadli ko‘rsatkichni amalga oshirish belgilangan.
Shuningdek, farmon bilan, Atrof-muhitni muhofaza qilish yo‘nalishida vazirlik va idoralar tomonidan birinchi navbatda amalga oshirilishi zarur bo‘lgan chora-tadbirlar, “Yashil turizm” dasturini amalga oshirish chora-tadbirlar rejasi, hududlarda kichik quvvatli qayta tiklanuvchi energiya manbalari qurilmalarini o‘rnatish, bahor-kuz mavsumida “Yashil makon” umummilliy loyihasi doirasida mahallalarda daraxtlar ekish bo‘yicha, bahor mavsumida mahallalarda gul va ko‘chatlar ekish bo‘yicha rejalar tasdiqlandi.
Davlat dasturidagi aksariyat vazifalar aholining turmush tarzini yanada yaxshilash, ijtimoiy masalalarni samarali yechish bilan chambarchas bog‘liq. Shu ma’noda ushbu dastur O‘zbekiston Xalq demokratik partiyasining g‘oya va maqsadlari bilan har tomonlama uyg‘un va hamohangdir.
Uchrashuvda yoshlarni qo‘llab-quvvatlash, ularning manfaatlarini himoya qilish bo‘yicha fikr-mulohazalar bildirilib, ishtirokchilar o‘zlarini qiziqtirgan savollariga javob oldi.
Dovud Abibullayev,
O‘zA muxbiri.