Shu kunlarda mahalliy Kengashlar deputatlari o‘zlari saylangan hududlarda bo‘lib, aholi bilan muloqotlar o‘tkazyapti, deb xabar bermoqda O‘zbekiston XDP Xorazm viloyat kengashi xodimi Nazokat Masharipova. Ularda fuqarolarni o‘ylantirayotgan masalalar o‘rganilib, hal etish choralari ko‘rilmoqda.

Ma’lum bo‘lishicha, xalq deputatlari Yangiariq tuman Kengashidagi partiya guruhi a’zosi G‘ayrat Eshmetov «Killovut» mahallasida fuqarolar qabulini o‘tkazdi. Unda mahalla raisi Abdulla Sapayev qatnashdi va fuqarolar tomonidan bildirilgan murojaatlar yechimiga alohida e’tibor qaratdi.

Saylovchilar «Killovut», «Savgan» mahallalaridan kesib o‘tgan «Navro‘z» kanalini qazish zaruratini bildirdi. Shuningdek, «Saxovat» ko‘chasida tungi chiroqlar yo‘qligi turli xatarlarni keltirib chiqarayotgani ta’kidlandi. Shu sababli tungi chiroqlar o‘rnatishga amaliy yordam so‘raldi. Aholi vakillari moddiy yordam, bola puli masalalarida ham murojaat qildi.

Uchrashuvda davomida bildirilgan muammo va kamchiliklar bo‘yicha tegishli tashkilotlarga deputat so‘rovlari chiqarildi.

Shunga o‘xshash tadbir Qo‘shko‘pir tuman Kengashidagi partiya guruhi a’zosi Nilufar Ibragimova tomonidan ham tashkil etildi. Deputatning Dovud mahallasidagi uchrashuvlari ham samarali kechdi.

Xalq vakili saylovchilarning 15 ga yaqin murojaatini ko‘rib chiqdi. Ularning 3 tasi joyida hal etildi va muddat talab qiladigan masalalar yuzasidan chora-tadbirlar ishlab chiqilib, mas’ullarga ijro uchun yo‘naltirildi.

Shuningdek, deputat aholi xonadonlarining tomorqa yerlaridan foydalanish holatlariga ham e’tibor qaratdi. Fuqarolarga har bir qarich yerdan samarali foydalanish, uylarning tevarak-atroflarini obodonlashtirish, daraxtlarni oqlash, gullar, mevali va manzarali daraxt ko‘chatlarini o‘tqazish, umuman olganda ko‘kalamzorlashtirish ishlarini amalga oshirish bo‘yicha tushuntirishlar berdi.