Mamlakatimiz yangilanish davriga qadam qo‘ygan birinchi kunlardan boshlab ochiq, pragmatik va faol tashqi siyosat yuritish, dunyodagi barcha taraqqiyparvar mamlakatlar, ayniqsa, qo‘shni davlatlar bilan yaqin do‘stlik va hamkorlik munosabatlarini mustahkamlashga ustuvor ahamiyat qaratmoqda. O‘tgan tarixan qisqa davrda yurtimizning Markaziy Osiyo mintaqasi va jahon miqyosidagi siyosiy o‘rni va nufuzi keskin oshdi. Dunyoda Yangi O‘zbekistonga nisbatan ishonch ruhi va mamlakatimiz bilan hamkorlikka intilish tamoyillari kuchaydi.
O‘zbekiston ushbu jarayonda xalqni, davlatning manfaatidan kelib chiqib, qaysi davlat bilan ikki tomonlama hamkorlikni rivojlantirishga imkoniyatlar bo‘lsa, mana shu imkoniyatlardan juda faol foydalanib, dunyoning turli chekkalaridagi mamlakatlar bilan, turli masalalarda hamkorlikni yo‘lga qo‘yib kelmoqda.
O‘zbekiston va Malayziya o‘rtasidagi munosabatlar uzoq tarixga borib taqalsada, so‘nggi 17 yil ichida ilk bor Malayziya bosh vaziri Anvar Ibrohim o‘tgan yili may oyida mamlakatimizga rasmiy tashrifni amalga oshirdi va bu oliy darajadagi tashrif deb baholanib, ikki tomonlama munosabatlar tarixda yangi davrni boshlab berdi.
Mamlakatlarimiz geografik jihatdan bir-biridan olis bo‘lishiga qaramay, transport va logistika imkoniyatlari kengayib bormoqda. Poytaxtlar o‘rtasida deyarli har kuni to‘g‘ridan-to‘g‘ri aviaqatnovlar amalga oshirilmoqda.
So‘nggi yillarda O‘zbekiston va Malayziya o‘rtasida ikki tomonlama tovar ayirboshlash hajmi 2,5 barobar oshdi, O‘zbekiston hududida Malayziya kapitali ishtirokidagi qo‘shma korxonalar soni 37 taga yetdi.
O‘zbekiston Respublikasi Prezidenti Sh.Mirziyoyevning Malayziyaga rasmiy tashrifi davomida, iqtisodiyot, madaniyat, energetika, ta’lim va raqamli texnologiyalar sohalari hamda “yashil iqtisodiyot”ni rivojlantirishni yangi bosqichga olib chiqishda, ushbu tashrif samarali huquqiy bazani shakllantirishga imkoniyat yaratdi.
Malayziya O‘zbekistonning muhim innovatsion va texnologik hamkoridir. Tashrif davomida O‘zbekiston-Malayziya iqtisodiy hamkorligi yangi modelining ustuvor yo‘nalishlari belgilab olindi. Bular – neft-kimyo va kimyo, elektronika va yarimo‘tkazgichlar sanoati, innovatsion sanoat, "aqlli" qishloq xo‘jaligi, "yashil" energetika, ziyorat turizmi va boshqalardan iborat.
Shuningdek, ikkala davlatning ham ijtimoiy-iqtisodiy taraqqiyotining drayveri hisoblangan raqamli iqtisodiyot yoki raqamli transformatsiya sohasini rivojlantirishga ham ustuvorlik berildi. Misol uchun, O‘zbekiston ham so‘nggi yillarda birgina IT parklar yoki IT sohasida mutaxassislarni tayyorlash borasida katta yutuqlarga erishdi. Bugungi kunda O‘zbekiston eksportida IT mahsulotlarini ulushi ham tobora ortib bormoqda. Shuningdek, ikki davlat o‘rtasidagi istiqbolli loyihalardan biri sun’iy intellekt, elektronika va yarimo‘tkazgichlar sanoatida uzoq muddatli hamkorlikni kengaytirishdir.
Ma’lumki, Malayziya rivojlanishining asosiy omillardan biri bu xorijiy investitsiyalarni yarim o‘tkazgichlar sanoatiga kiritilganini aytish mumkin. Yarim o‘tkazgichlar elektronika sanoatning asosiy xom ashyosi hisoblangan. Malayziyada yarim o‘tkazgichlar strategik sanoatini rivojlantirish iqtisodiyotning rivojlanishiga turtki bergan. Bu sanoatni rivojlantirishda Malayziya 32 million kishilik ichki bozoriga emas, balki tashqi bozorlarga yo‘naltirilganligini ta’kidlash kerak.
Mamlakatimizda ham elektrotexnika sanoati sohasida yaratilgan sharoitlar natijasida so‘nggi yetti yilda respublikaning yirik mahalliy sanoat tarmog‘iga aylandi, tarmoqda ishlab chiqarish hajmi qariyb 2 barobarga, eksport hajmi 7 barobarga o‘sdi va geografiyasi 63 ta davlatga yetdi.
Yetakchilar tomonidan 2025-2026 yillarni O‘zbekiston-Malayziya sherikligini innovatsion rivojlantirish davri deb e’lon qilinishi, yurtimizda investitsiya loyihalarini amalga oshirishga imkoniyat beradi. Buning natijasida ko‘plab yangi ish o‘rinlari yaratiladi.
Tashrif yakunlari bo‘yicha ko‘p qirrali hamkorlikni chuqurlashtirish to‘g‘risida Qo‘shma bayonot imzolandi. Shuningdek, yuqori texnologik loyihalarni ilgari surish maqsadida yurtimizda O‘zbekiston – Malayziya sanoat zonasi tashkil etishga kelishildi. O‘tkazilgan biznes forum davomida umumiy qiymati 3 milliard dollardan ziyod 19 ta investitsiya bitimi imzolandi.
Dilbar Mamadjanova,
Oliy Majlis Qonunchilik palatasi deputati,
O‘zXDP fraksiyasi a’zosi.