Тошкент шаҳрида Ўзбекистон ХДП Марказий Кенгаши раиси Улуғбек Иноятов Осиё сиёсий партиялари халқаро конференцияси (ICAPP) доимий қўмитаси раиси Чон Ый Ён билан учрашув ўтказди. Унда Корея Республикасининг Ўзбекистон Республикасидаги элчиси Вон До Ён ва бошқа масъуллар иштирок этди.

Ўзбекистон Халқ демократик партияси етакчиси Улуғбек Иноятов меҳмонларни Халқ демократик партиясининг дастурий мақсад ва вазифалари, амалий фаолияти билан таништирди. Шунингдек, ICAPP халқаро ташкилотининг фаолияти минтақавий ҳамкорликни ривожлантириш, барқарорлик ва умумий фаровонликка ҳисса қўшишда ўзига хос аҳамиятга эга экани қайд этилди.

Жаноб Чон Ый Ён ICAPPнинг мақсад ва вазифалари, бугунги кунда олиб бораётган ишлари тўғрисида маълумот берди. 370 дан ортиқ сиёсий партия аъзо бўлган ташкилот билан ҳамкорликнинг муҳим жиҳатларига тўхталиб ўтди. Халқ демократик партияси вакиллари ICAPP фаолиятида мунтазам иштирок этиб келаётгани билдирилди.

Самимий ва дўстона руҳда ўтган учрашувда ўзаро ҳамкорлик турли давлатлар сиёсий партиялари ўртасида ахборот ва тажриба алмашишни йўлга қўйиш, ўзаро тушуниш ва ишончни мустаҳкамлашда муҳим аҳамият касб этиши таъкидланди.