Олий Мажлис Қонунчилик палатасидаги Ўзбекистон Халқ демократик партияси фракциясининг навбатдаги йиғилиши бўлиб ўтди.

Фракция йиғилишида йўл ҳаракати хавфсизлиги тизими ҳамда интеллектуал мулк объектларининг фуқаролик муомаласидаги айланмаси оширилиши ва патент вакилларининг ҳуқуқлари кенгайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш, шунингдек, Бирлашган Миллатлар Ташкилотининг медиация натижасида эришилган халқаро келишув битимлари тўғрисидаги конвенциясига Ўзбекистон Республикасининг қўшилиши тўғрисидаги қонун лойиҳалари муҳокама қилинди.

Дастлаб, йўл-транспорт ҳодисаларининг олдини олиш мақсадида йўл ҳаракати қоидабузарликлари учун жавобгарликни такомиллаштиришга қаратилган ҳамда Жиноят, Жиноят-процессуал ва Маъмурий жавобгарлик тўғрисидаги кодексларга ўзгартириш ва қўшимчалар киритилишини назарда тутувчи қонун лойиҳаси кўриб чиқилди.

Мазкур қонун лойиҳаси билан “автомототранспорт воситасини вақтинча олиб қўйиш” жазо чораси, вояга етмаган шахсга транспортни бошқаришга топшириш, ноқонуний пойга ташкил этиш ва бевосита иштирокчи сифатида қатнашиш, юк машиналарини тунги вақтда йўл четида ҳаракат иштирокчиларига хавф туғдирадиган ҳолатда тўхтаб туриши ёки ташлаб кетиш, транспорт воситасини бошқаришда белгиланган тезликни 80 км/соатдан ортиқ катталикда ошириш каби қоидабузарликлар учун алоҳида маъмурий жавобгарлик нормаларини киритиш назарда тутилмоқда.

Шу билан бирга, амалда қўлланилган жарима ва 15 сутка қамоқ жазоси транспортни бошқариш ҳуқуқи бўлмаган ва маҳрум этилган шахс содир этган “йўл безорилиги” учун қўшимча равишда транспортни мусодара қилиш ёки транспортни вақтинча олиб қўйиш жазо санкциялари билан оғирлаштирилиши белгиланмоқда.

Фракция аъзолари кўзда тутилаётган ушбу янги нормаларни амалиётга татбиқ этишдан аввал хорижий давлатлар тажрибасининг ўрганилгани, йўлларда пиёдалар ва ҳайдовчиларнинг эркин ҳамда қулай ҳаракатланишлари учун хавфсиз ҳаракат тизимини янада такомиллаштириш, олис ва чекка ҳудудларда ҳам светофорларнинг узлуксиз ва аниқ ишлашини таъминлаш, йўл белгилари ҳамда тезликни ўлчовчи техник мосламаларни аввалдан огоҳлантирувчи ҳудудларга ўрнатиш лозимлиги борасида ўзларини қизиқтирган саволлар билан мурожаат қилдилар.

Масъул ишчи гуруҳ вакиллари юқорида кўтарилган саволлар юзасидан батафсил жавоблар бергач, депутатлар томонидан ушбу қонун лойиҳасининг бугунги кунда долзарб масалаларни қамраб олгани, маъмурий ҳуқуқбузарлик содир этган шахснинг оиласи нормал турмуш кечириши учун зарур бўлган ягона транспорт воситасининг вақтинча олиб қўйилмаслиги тўғрисида киритилаётган меъёр Ўзбекистон Халқ демократик партиясининг принципиал мақсадларига мослиги алоҳида таъкидланиб, қонун лойиҳаси биринчи ўқишда маъқулланди.

Йиғилишда фракция аъзолари томонидан жорий йилнинг 29-31 июль кунлари ҳудудларда сайловчилар билан ташкил этган очиқ мулоқотлари, ижтимоий соҳа объектларини ўрганиш натижалари, учрашувларда фуқаролар томонидан кўтарилган муаммолар ва уларнинг ечимига қаратилган амалий таклифлар ҳам кўриб чиқилди.

Йиғилиш якунида кун тартибидаги масалалар бўйича фракциянинг тегишли қарорлари қабул қилинди.