Амалдаги қонунчиликка кўра депутатлар турли соҳаларда фаолият юритувчи, тажрибали, фидойи, жамиятда ҳурмат қозонган ва обрў-эътиборга эга шахслар орасидан сайланади. Депутат нафақат ўз сайловчиларининг, балки тегишли ҳудудда яшовчи барча фуқароларнинг вакили ҳисобланади. Уларнинг ҳуқуқ ва манфаатларини ифода этади, ҳимоя қилади.
Ўзбекистон Халқ демократик партияси маҳаллий Кенгашлар депутатларининг ҳудудлардаги долзарб ижтимоий-иқтисодий масалаларни ҳал этишда, электорат манфаатларини самарали ҳимоя қилишда, стратегия ва дастурларда белгиланган вазифаларнинг жойлардаги ижроси устидан жамоатчилик назоратини олиб боришда тўплаган улкан тажрибаларини алмашиш учун ҳар йили “Энг фаол депутат” кўрик-танловини ўтказиб келади.
“Энг фаол депутат” кўрик-танловининг бу йилги республика босқичи “Кучли ижтимоий сиёсатни амалга оширишга интиламиз!” шиори остида Самарқанд шаҳрида бўлиб ўтди. Унда Қорақалпоғистон Республикаси, Тошкент шаҳар ҳамда вилоятлар босқичида ғолибликни қўлга киритган 14 нафар депутатлар иштирок этди.
Танловда депутатлар 3 та шарт асосида баҳоланди.
Биринчи шарт “Аҳоли муаммосини ҳал этишнинг энг самарали йўли”, деб белгиланди. Мазкур шартда иштирокчилар ўзларининг ҳудудларидаги аҳолининг ижтимоий муаммоларини ўрганиш, ҳуқуқ ва манфаатларини ҳимоя қилиш, партиянинг сайловолди дастурида белгиланган устувор вазифаларни қайси самарали йўл билан амалга ошираётганини тақдимот орқали тушунтириб беришди.
Танловнинг иккинчи шарти “Сиёсий ҳозиржавоблик”, деб номланди. Унда иштирокчилар билан оғзаки савол-жавоб ўтказилди. Бунда депутатларнинг саволларга қисқа вақтда аниқ ва тезкор жавоб бериши синовдан ўтказилди.
Танловнинг учинчи шарти “Муаммони ҳал қилиш”, деб номланиб, унда иштирокчиларга аниқ бир муаммоли вазият берилиб, депутатларнинг оқилона ечим топишига эътибор қаратилди.
Ҳакамлар ҳайъати ҳар бир шарт бўйича иштирокчиларни белгиланган мезонлар асосида баҳолаб борди.
Умумий баллар натижасига кўра, Сирдарё вилоятидан депутат Азизбек Раҳмонов энг юқори балл тўплаб якунда ғолибликни қўлга киритди. Баҳром Ҳамроқулов (Жиззах) ва Санжар Собиржоновлар (Тошкент шаҳри) 2-ўринни, Олим Бақоев (Бухоро), Гулшанда Бобомуродова (Навоий) ва Облоберди Олимовлар (Фарғона) фахрли 3-ўринни эгаллашди.
Қолаверса, кўрик-танловнинг барча босқичида фаол иштирок этган иштирокчилар:
- “Энг шижоатли депутат”
- “Ташаббускор депутат”
- “Энг меҳнаткаш депутат”
- “Йилнинг энг халқпарвар депутати”
- “Энг адолатли депутат”
- “Йилнинг энг яхши депутат аёли”
- “Янги қонунларга фаол таклиф берувчи депутат”
- “Партия ғояларини энг фаол тарғиб қилувчи депутат” номинациялари бўйича тақдирландилар.
Ғолиблар Ўзбекистон Халқ демократик партияси Марказий Кенгашининг диплом ва қимматбаҳо совғалари билан тақдирландилар.
Танловнинг ёпилиш маросимида сўзга чиққанлар ушбу танлов 1200 нафарга яқин маҳаллий Кенгаш депутатларининг ўзаро амалий тажриба алмашишида, мурожаатларни ҳал қилиш, партия дастурий мақсадлари билан боғлиқ масалаларда депутатлик ва жамоатчилик назоратини амалга ошириш, партия гуруҳлари ўрганишлари ва муҳокамалари орқали сессияларга самарали ташаббуслар билан чиқиш, депутат сўрови институти имкониятларидан электорат манфаатлари ҳимоясида натижадорликни кўтаришда муҳим аҳамият касб этишини таъкидлашди.