Ҳазорасп туман Кенгашидаги депутатимиз М.Ваисовга туманнинг "Мунис-Хоразмий" маҳалласи фуқароларидан мурожаат келиб тушган эди.
Мурожаатда маҳалладаги 19-сон умумий ўрта таълим мактабида қўшимча янги бинога эҳтиёж борлиги айтилган.
Депутат томонидан мактабнинг ҳолати ўрганилиб, таҳлил қилинганида, мактаб 2001 йили ишга туширилгани ва 675 ўринга мўлжаллангани аниқланган. Лекин ҳозирги кунда у ерда 1175 ўқувчи таълим олаётган бўлиб, бу белгиланган ўқувчи сиғимидан деярли икки баравар кўплигини англатади.
Шу сабабдан депутат тегишли ташкилотларга депутатлик сўровлари юбориб, масалага ечим излади. Натижада, депутатимиз ташаббуси билан мактабни реконструкция қилиш ва қўшимча янги бино қуриш учун 9 миллиард 494 миллион сўм маблағ ажратилди.
Ҳозирда қурилиш ва реконструкция ишлари қизғин давом этмоқда.