Бугунги парламент қуйи палатаси мажлисида ЎзЛиДеП фракциясининг бир гуруҳ аъзолари қонунчилик ташаббуси ҳуқуқи асосида ишлаб чиққан “Ўзбекистон Республикасининг Меҳнат кодексига хусусий сектор учун белгиланган ижтимоий мажбуриятларни соддалаштиришга қаратилган қўшимча ва ўзгартиришлар киритиш ҳақида”ги қонун лойиҳаси қизғин муҳокама қилинди.

Гап шундаки, қонун ташаббускорлари меҳнат шартномасини иш берувчи ташаббусига кўра бекор қилишда касаба уюшмаси қўмитаси ёки маҳаллий меҳнат органи билан келишиш жараёнларини хабардор қилиш тартибига ўтказиш, тадбиркорлик субъектларида ўриндошлик асосида фаолият юритаётган ходим билан меҳнат шартномаси бекор қилинганда огоҳлантириш муддати ва компенсация тўловларини бекор қилиш каби таклифлар билан чиққанди.

Аммо ЎзХДП фракцияси аъзолари сўл позициясида туриб позициясини билдирди. Хусусан, депутат Шокиржон Аҳмедов касаба уюшмаси қўмитасининг розилигини олмасдан туриб, шунчаки хабардор қилиш билан ходимни ишдан бўшатиш мумкинлиги ҳақидаги меъёр фундаментал меҳнат ҳуқуқига зид келишини таъкидлади.

Овоз бериш жараёнида лойиҳага Халқ демократлари тўлиқ қарши овоз берди. ЎзХДП фракцияси сўл позициясида қатъий қолди.