Шу кунларда Ўзбекистон катта демократик байрамга қизғин ҳозирлик кўрмоқда. Давлатимизнинг парламент дипломатиясидаги муваффақиятларига дунё нигоҳи қаратилган. Яъни, юртимиз 5-9 апрель кунлари тарихий ва геосиёсий жиҳатдан муҳим халқаро сиёсий марказ сифатида энг йирик парламентлараро анжуманга мезбонлик қилади. Қарийб бир ҳафта мобайнида мамлакатимиз йирик халқаро парламент тузилмаларининг тўлақонли аъзоси сифатида глобал муҳокамалар майдонига айланади.

190 га яқин мамлакат парламентини бирлаштириб келаётган Парламентлараро иттифоқнинг 150-юбилей Ассамблеяси илк бор Марказий Осиёда, юртимизда ўтказиляпти. Бундай нуфузли ташкилотнинг юбилей тадбири айнан Тошкентда ўтказилиши бу янги Ўзбекистон учун муҳим тарихий воқеадир.

Албатта, бу халқаро даражада парламент дипломатиясини ривожлантириш, минтақанинг глобал сиёсий жараёнларга интеграциялашувини кучайтириш, шу билан бирга, мамлакатимизнинг жаҳон ҳамжамияти олдидаги имиджини оширишга хизмат қилади. Бу том маънода, мамлакатимиз учун халқаро сиёсий майдонда муҳим бурилиш нуқтаси бўлиши аниқ.

Ушбу халқаро тадбирда 180 давлат, 15 та кузатувчи мамлакат ва 25 дан ортиқ халқаро ҳамда парламентлараро ташкилотлардан 2 мингга яқин делегат иштирок этиши кутилмоқда.

Халқаро аҳамиятга эга бундай нуфузли тадбирнинг юртимизда ўтказилишида ўзига хос рамзий маъно бор. Бу Ўзбекистон демократик бошқарув йўлидан дадил одимлаётганини англатади. Чунки ушбу нуфузли тузилма ўзининг юқори органи Ассамблеяни парламентаризм ва барқарор ривожланишнинг ижобий тажрибаси мавжуд бўлган мамлакатларда ўтказади.

Яна бир эътиборли жиҳати, жаҳон парламентларининг энг нуфузли ташкилоти ҳисобланадиган Парламентлараро Иттифоқнинг бундай катта анжумани мамлакатимизда ўтказилиши Ўзбекистонда амалга оширилаётган демократик ислоҳотлар жаҳон ҳамжамияти томонидан эътироф этилаётганининг яққол ифодасидир. Бу мамлакатимизнинг прагматик ташқи сиёсат соҳасидаги оқилона ёндашуви ва халқаро майдондаги нуфузи тобора ортиб бораётганининг яна бир далилидир.

Айтиш керакки, қонунчилик ва қонун ижодкорлиги соҳасидаги ушбу муҳим тадбир мамлакатлар ўртасидаги ҳамкорликни ривожлантириш ва демократик тамойилларни илгари суришда ҳам катта роль ўйнайди.  Шунингдек, ушбу анжуман қонун ижодкорлиги, парламент назорати ва шу каби йўналишлардаги миллий тажрибамиз дунё ҳамжамияти томонидан кенг эътироф этилаётганини ҳам тасдиқлайди. Чунки парламентаризм ҳар қандай демократик тизимнинг асосидир.

Ўзбекистон Парламентлараро Иттифоққа 1992 йилда аъзо бўлган. Аммо мамлакатимизнинг Парламентлараро иттифоққа аъзолиги 2017 йилда, яъни Ўзбекистон ўз тараққиётида янги босқичга ўтган вақтда, изчил ислоҳотларни дадил бошлаган пайтда қайта тикланди. 2019 йил 17 октябрда Ўзбекистон тарихида илк бор мамлакатимиз вакили Парламентлараро Иттифоқ Ижроия қўмитасининг аъзоси бўлди.  Ўтган қисқа давр ичида, жумладан, миллий парламентаризм ва барқарор ривожланиш соҳасида улкан тажриба тўпланди.

Маълумки, давлатимиз раҳбари Парламентлараро иттифоқнинг 150-юбилей ассамблеясини Ўзбекистонда ўтказиш ташаббусини билдирган эди. Мазкур нуфузли анжуман “Ижтимоий тараққиёт ва адолат учун парламент ҳаракати” деган умумий шиор остида бутун дунё парламентлари никоҳини аҳолини ижтимоий ҳимоя қилиш ва камбағалликни қисқартириш, қонун устуворлигини таъминлаш, инсон ҳуқуқларини ҳимоя қилиш, гендер тенгликни таъминлаш; илм-фан, технологияни ривожлантириш ва ёшларни қўллаб-қувватлаш каби долзарб масалалар муҳокамасига қаратмоқда. Бу борадаги ўзаро тажрибалар мулоқот моҳиятини ташкил этмоқда.

Катта давранинг катта минбарида кўриб чиқиладиган ушбу йўналишлар бежиз танланмаган. Чунки, сўнгги етти йилда мамлакатимизда  Президентимиз бошчилигида ушбу соҳаларда сезиларли ижобий натижаларга эришди. Ассамблея, Ўзбекистоннинг мана шундай ижобий тажрибасини жаҳон мамлакатлари билан бўлишиш, ўртоқлашиш имкониятини ҳам беради.

Сўнгги йилларда Ўзбекистоннинг барқарор ривожланиш бўйича мақсадлари, мамлакатимиздаги парламент фаолиятини кучайтириш, назорат функциялари таъсирчанлигини оширишга қаратилган ислоҳотлар бутун дунёга кўрсатиш, тақдим этишга муносиб, деб бемалол айта оламиз. Албатта, бугун Янги Ўзбекистондаги ижтимоий адолат ва ижтимоий барқарорликка асосланган халқпарвар сиёсат халқаро минбарларда эътироф этилаётгани кишига мамнуният бағишлайди. Давлатимиз раҳбари бошчилигида ижтимоий ҳимоя бўйича олиб борилаётган кенг кўлами ислоҳотлар ва уларнинг натижалари ҳам буни тасдиқлайди.  

Сўнгги йилларда камбағалликни қисқартириш, аҳолининг даромадларини ошириш, эҳтиёжманд инсонларга елка тутиш, уларга яқиндан ёрдам бериш, ижтимоий-иқтисодий фаолликни рағбатлантириш, умуман инсон ҳуқуқ ва манфаатларини таъминлаш давлат ва жамиятимизнинг устувор мақсадига айланди.

Масалан, камбағалликни икки баробар қисқартириш мақсад қилиб олинди. Камбағалликни қисқартириш мақсадида ижтимоий ёрдамнинг янги ва самарали механизмлари жорий этилди. Жамиятимизда ижтимоий муҳит тубдан ўзгарди. Қиёсласак, аҳолини ижтимоий ҳимоя қилиш борасидаги ўзгаришлар, янгиланишлар нафақат қарорлар ва дастурларда, балки оилалар турмушида акс этаётганига амин бўламиз. Рақамлар, асосийси, ҳаётий натижалар буни исботлаб турибди.

Масалан, ҳудудларимизда “Инсон” марказлари очилиб, 102 та ижтимоий хизмат маҳаллаларда йўлга қўйилди. Маҳалладаги ижтимоий ходимлар уйма-уй юриб, шу йил реестрда бўлмаган яна 95 минг муҳтож одамга ёрдам кўрсатди. 51 минг одамга ногиронлик белгиланди, 26 минги протез олди, ногиронлиги бор 5 минг бола боғча-мактабга жойлашди. Бу рақамлар оддий рақамлар эмас, уларнинг ортида қанчадан-қанча юртдошларимизнинг рози-ризолиги масаласи бор. Энг муҳими, бу рақамлар, Ўзбекистоннинг “ижтимоий давлат” сифатидаги мақоми мустаҳкамланаётгани, жамиятда ижтимоий адолат тамойиллари қарор топаётганини кўрсатиб турибди.

Умуман олганда, Парламентлараро Иттифоқнинг 150-юбилей Ассамблеясининг мамлакатимизда ўтказилиши ижтимоий ўзгаришларнинг эътирофи, инсон қадрини улуғлаш, ижтимоий ҳимояни кучайтиришга қаратилган муҳим сиёсий платформа ҳамдир. Чунки инсоний муносабатлар парламент дипломатияси муваффақиятини белгилайди.

Бу Ўзбекистоннинг демократик ислоҳотларга содиқлигини ифода этиш баробарида минтақадаги конструктив сиёсий мулоқот маркази сифатидаги мақомини мустаҳкамлашга хизмат қилади.

Муқаддас ЎРОЗАЛИЕВА,

Олий Мажлис Қонунчилик палатаси депутати,

ЎзХДП фракцияси аъзоси.